ಸತ್ತ ಸಂಬಂಧಗಳು

ಸತ್ತ ಸಂಬಂಧಗಳ ಸರತಿ ಸಾಲಿನಲಿ ಸದ್ದಿಲ್ಲದೆ ನಡೆದವನು ನಾನು!
ಚುಚ್ಚಿ, ಚಿವುಟಿ, ಮನ ಛಿದ್ರಗೊಳಿಸಿದ್ದು ಇವರೇ ಅಲ್ಲವೇನು!

ಕಾಯುವ ದೊರೆ

ಕಾಯುವ ದೊರೆ ನೀನು

ಕಾಡುವ ಮನಸ್ಯಾಕೆ ದೊರೆಯೇ...

ಕಾದರು, ಕೊಂದರು... ಕೇಳುಗ ನೀನೆ

ಗೆದ್ದರು, ಸೋತರು... ನಾ ಹೇಳುವೆ ನಿನಗೇನೇ...

ಜವಬ್ದಾರಿ

ಜವಬ್ದಾರಿಗಳೆಂಬ ಜಾತ್ರೆಯಲಿ ಕಳೆದುಹೋದವರು ನಾವು
ಹಬ್ಬವೋ, ಹರಕೆಯೋ ಕರ್ತವ್ಯದ ಕರೆಗಂಟೆ ಬಾರಿಸುವವರು ನಾವು
ಜಾತ್ರೆಯೂ ಜಗಮರೆಸಲಾರದ ಜಟಿಲರು ನಾವು

ಬರಹ, ಬೇಗುದಿ...!

ನೋವಿಗಿಷ್ಟು, ನಲಿವಿಗಿಷ್ಟು,
ನೆನೆದ ನೆತ್ತರಿಗಿಷ್ಟು,
ಕರಗಿದ ಕಣ್ಣಿರಿಗೂ ಇಷ್ಟು ಬರಹ...! 

ಮಾತು ಮರೆತು, ಭಾವ ಬರೆದು,
ಏಕಾಂತದಿ ಎದ್ದು,
ಬಸಿಯಬೇಕಿದೆ ಮನದ ಬೇಗುದಿ...!

ರೈತ ಮಕ್ಕಳೇ...

ಬನ್ನಿ ನನ್ನೂರಿಗೆ

ಸ್ವರ್ಗದ ತವರಿಗೆ

ಗಿಡವೊಂದು ಮರವಾಗೆ

ಕಾಳೊಂದು ತೆನೆಯಾಗೆ

ದೇಶಕನ್ನವ ನೀಡುವಲ್ಲಿಗೆ

ಇಲ್ಲಿ, ರಾಗ ದ್ವೇಷಗಳುಂಟು

ಪ್ರೀತಿ ಪ್ರೇಮಗಳುಂಟು

ನೆನಪುಗಳುಂಟು

ನೀವಿಟ್ಟ ಹೆಜ್ಜೆಗುರುತುಗಳುಂಟು

ಆದರಿಸುವ ಭುಜಬಲಗಳುಂಟು

ಬೆಂದ ಬೇಗೆಯಲಿ

ನೊಂದು ನಲಿಯುತಲಿ

ಮೆಟ್ಟ ಊರಲ್ಲಿ ಒಂಟಿ ಅಲೆಯುತಲಿ

ನಿಮ್ಮ ಮನ ಸುಡುದಿರಲಿ

ಕಾದಿಹುದು ನಿಮ್ಮ ನೆಲವಿಲ್ಲಿ

ಬನ್ನಿ ನನ್ನೂರಿಗೆ

ಸ್ವರ್ಗದ ತವರಿಗೆ...

- ಪ್ರಸಾದ್ ಟಿ ಎಮ್

ಅರಿತು ಹಂಚೋಣ

ಬದಲಾಗದಿದ್ದರೆ ಬಡವಾದೆವು
ಕಲಿಯದಿದ್ದರೆ ಜಡವಾದೆವು
ಓದಿ-ಬರೆಯದಿದ್ದರೆ ಬರಡಾದೆವು
ಅರಿಯದಿದ್ದರೆ ಅಂಧರಾದೆವು
ದುಡಿಯದಿದ್ದರೆ ದುಃಖಿತರಾದೆವು
 
ಕುಳಿತು ಕುಬ್ಜನಾಗುವ ಬದಲು, ನಿಂತು ನೆರಳಾಗು
ನಿಂತು ನರಳುವ ಬದಲು, ನಡೆದು ನೆಲೆಯಾಗು
ಕೂತು ಕೊರಗುವ ಬದಲು, ಕಲಿತು ಕಲೆಯಾಗು
ಕಲಿತದ್ದ ಕೊಳೆಸುವ ಬದಲು, ತಿಳಿಸಿ ತಿಳಿಯಾಗು
ಸುತ್ತಲಿದ್ದವರ ಸೋಲಿಸುವ ಬದಲು, ಸ್ಫೂರ್ತಿಯಲಿ ನೀ ಗುರುವಾಗು

ಅಪ್ಪ

ನಿಮ್ಹೆಗಲೇ ನನ್ನಾಸನ 

ನಿಮ್ಮೆದೆಯೇ ನನ್ಹಾಸಿಗೆ 

ನಿಮ್ಮಾಸೆ ಕಣ್ಗಳೇ ನನ ಭವಿಷ್ಯ

ನೀವಿತ್ತ ಅರಿವಿನಕ್ಷರ ನನ ಅಕ್ಷಿ

ನೀವ್ ಮೆಟ್ಟಿದ ಮಣ್ಣೇ ನನ ಮಾತೆ

ನಿಮ್ಮ ಬವಣೆಯ ಬೆವರೇ ನನ ಬದುಕು

ನೀವ್ ನಡೆದ ದಾರಿಯೇ ನನ ಗುಡಿ ಗೋಪುರ

ನನ್ನರಿವಿನ ಅನಂತತೆಯಲಿ ನೀವ್ ಅಮರ... ಅಮರ...