ಅರಿತು ಹಂಚೋಣ

ಬದಲಾಗದಿದ್ದರೆ ಬಡವಾದೆವು
ಕಲಿಯದಿದ್ದರೆ ಜಡವಾದೆವು
ಓದಿ-ಬರೆಯದಿದ್ದರೆ ಬರಡಾದೆವು
ಅರಿಯದಿದ್ದರೆ ಅಂಧರಾದೆವು
ದುಡಿಯದಿದ್ದರೆ ದುಃಖಿತರಾದೆವು
 
ಕುಳಿತು ಕುಬ್ಜನಾಗುವ ಬದಲು, ನಿಂತು ನೆರಳಾಗು
ನಿಂತು ನರಳುವ ಬದಲು, ನಡೆದು ನೆಲೆಯಾಗು
ಕೂತು ಕೊರಗುವ ಬದಲು, ಕಲಿತು ಕಲೆಯಾಗು
ಕಲಿತದ್ದ ಕೊಳೆಸುವ ಬದಲು, ತಿಳಿಸಿ ತಿಳಿಯಾಗು
ಸುತ್ತಲಿದ್ದವರ ಸೋಲಿಸುವ ಬದಲು, ಸ್ಫೂರ್ತಿಯಲಿ ನೀ ಗುರುವಾಗು

ಅಪ್ಪ

ನಿಮ್ಹೆಗಲೇ ನನ್ನಾಸನ 

ನಿಮ್ಮೆದೆಯೇ ನನ್ಹಾಸಿಗೆ 

ನಿಮ್ಮಾಸೆ ಕಣ್ಗಳೇ ನನ ಭವಿಷ್ಯ

ನೀವಿತ್ತ ಅರಿವಿನಕ್ಷರ ನನ ಅಕ್ಷಿ

ನೀವ್ ಮೆಟ್ಟಿದ ಮಣ್ಣೇ ನನ ಮಾತೆ

ನಿಮ್ಮ ಬವಣೆಯ ಬೆವರೇ ನನ ಬದುಕು

ನೀವ್ ನಡೆದ ದಾರಿಯೇ ನನ ಗುಡಿ ಗೋಪುರ

ನನ್ನರಿವಿನ ಅನಂತತೆಯಲಿ ನೀವ್ ಅಮರ... ಅಮರ...

ಸ್ವತಂತ್ರರರೋ... ಅತಂತ್ರರೋ…

ದೇಶದ ಬೆನ್ನೆಲುಬು ಎನಿಸಿಕೊಂಡವರು
ಎಲ್ಲರ ಮುಂದೆ ಬೆನ್ನಬಾಗಿಸಿದವರು
ಚಿನ್ನದ ಬೆಳೆ ಬೆಳೆದು ಬಿಡಿಗಾಸಿಗೆ ಮಾರುವವರು
ಕನಿಷ್ಟ ಬೆಂಬಲ ಬೆಲೆಯನ್ನು ಪಡೆಯಲಾರದ ಕನಿಷ್ಠರು
ಮಧ್ಯವರ್ತಿಗಳಿಂದ ಮಾರಣ ಹೋಮವಾದವರು

ವರುಷವೆಲ್ಲ ಬೆಳೆದು ಒಪ್ಪತ್ತಿನ ಗಂಜಿಗೂ ಸಂಪಾದಿಸರಾದವರು
ಅಕ್ಷರಗಳಷ್ಟೆ ಅಕ್ಕರೆಯಾದವರು
ಹೆಜ್ಜೆಹೆಜ್ಜೆಗೂ ತುಳಿಯಲ್ಪಟ್ಟವರು
ವ್ಯವಸಾಯ ಮಾಡಬೇಕೇ ಎಂದು ಕೊರಗಿ ಕುಂತವರು
ನಾವು ಯಾರಿಗೂ ಬೇಡದ ರೈತರು!!!

ಅರಿವಿನಾನಂದ ಪಡೆಯುತಿರಲಿ

ಕಲಿತು ಮಾಡಿದ ಸಾಧನೆ 'ಕುಲ' ಬೆಳಗಿಸಲಿ

ಕಲಿತದ್ದು ಕೊಂಬಾಗಿ ಕೊಲ್ಲದಿರಲಿ

ಗರ್ವದಲಿ ಮನ ಮೆರೆದು ಮುಳುವಾಗದಿರಲಿ

ಈ ಮನ, ಅರಿವಿನಾನಂದ ಪಡೆಯುತಿರಲಿ

ಅರಿತರಿತು ಅನಂತತೆಯಡೆಗೆ ಸಾಗುತಿರಲಿ

ಬದುಕಲಿಸಿರಲು

ನೋವಿಷ್ಟು, ನಲಿವಿಷ್ಟು
ಕಲಿತರಿತದ್ದು ಬೊಗಸೆಯಷ್ಟು
ಖುಷಿಕೊಟ್ಟ ಕೃಷಿ
ಗಟ್ಟಿಮಾಡಿದ ಅಪ್ಪನಾನಾರೋಗ್ಯ
ಕೊಂಚ ಬಲಿತ ಬರಹ
ಬರೆದೆರಡು ಪುಸ್ತಕ, ಬದುಕಲಿಸಿರಲು

ನಾನೆಟ್ಟ ಮರ

ನಾನೆಟ್ಟ ಮರ,
ಪ್ರೀತಿಯಲಿಟ್ಟ ಗೊಬ್ಬರ,
ಸುಳಿ ಕೊಳೆ ರೋಗಕ್ಕೆ ತತ್ತರ,
ಇಂದದಕೆ ಕೊಡಲಿಯೇ ಆದಾರ

ಬೆಳೆದು ಬೆಳಕಾಗುವ

ನಾವೊಂದು ಹೆಮ್ಮರದ ನೆರಳು
ಬಾಹುಬಲ ಚಾಚಬೇಕಿದೆ ಬುಡದಿಂದಲೇ
ಬೇರಬಿಡದೆ ಭುವಿಯ ಸುತ್ತುವರಿಯಲು 

ಚಿಮ್ಮಿ ಬಿರಿದು ಬೆಳೆದ ಬಂಧುಗಳು
ಬುಡ ಬಿಟ್ಟರೆಂತು
ಮರನಿಂತಿತೇ ನೆರಳಿಲ್ಲದೆ

ಈಗೀಗ, ಮರ ಬೇಡಿದೆ ಆಸರೆಯ
ಅರಿವಿನಾಸರೆಯ, ಬೆಳಕಿನಾಸೆರೆಯ
ಬುಡಬಿಡದೆ ಬೆಳೆದು ನಿಲ್ಲುವವರಾಸರೆಯ

ಮರ ಮರುಗದಿರಲಿ
ಮನ ಬೆಳಗುತಿರಲಿ
ಅರಿವು ಅಂತರವ ತರದಿರಲಿ

ಅರಿತು ಮರೆಯಾಗದೆ
ಬೆಳೆದು ಬೆಳಕಾಗುವ
ಮರದ ಬುಡಬಿಡದೆ ಬೆಳೆದು ಬೆಳಕಾಗುವ