ಬೆಳೆದು ಬೆಳಕಾಗುವ

ನಾವೊಂದು ಹೆಮ್ಮರದ ನೆರಳು
ಬಾಹುಬಲ ಚಾಚಬೇಕಿದೆ ಬುಡದಿಂದಲೇ
ಬೇರಬಿಡದೆ ಭುವಿಯ ಸುತ್ತುವರಿಯಲು 

ಚಿಮ್ಮಿ ಬಿರಿದು ಬೆಳೆದ ಬಂಧುಗಳು
ಬುಡ ಬಿಟ್ಟರೆಂತು
ಮರನಿಂತಿತೇ ನೆರಳಿಲ್ಲದೆ

ಈಗೀಗ, ಮರ ಬೇಡಿದೆ ಆಸರೆಯ
ಅರಿವಿನಾಸರೆಯ, ಬೆಳಕಿನಾಸೆರೆಯ
ಬುಡಬಿಡದೆ ಬೆಳೆದು ನಿಲ್ಲುವವರಾಸರೆಯ

ಮರ ಮರುಗದಿರಲಿ
ಮನ ಬೆಳಗುತಿರಲಿ
ಅರಿವು ಅಂತರವ ತರದಿರಲಿ

ಅರಿತು ಮರೆಯಾಗದೆ
ಬೆಳೆದು ಬೆಳಕಾಗುವ
ಮರದ ಬುಡಬಿಡದೆ ಬೆಳೆದು ಬೆಳಕಾಗುವ

ಹಸಿವನೀಗ್ಯಾವ

ಕಲ್ಲು ಸವೆದಾವ

ಕುಡುಗೋಲು ಸವೆದಾವ

ಬೆನ್ನ ಮೂಳೆಯೂ ಸವೆದಾವ

ಕಷ್ಟದೊಳು ಕನಸುಗಳೂ ಸವೆದಾವ

ಸೋತರು ಬಿಡಲೊಲ್ಲೆನೆಂಬ ಛಲ ಬೆಳೆದಾವ

ಆ ಛಲದಿಂದ ಹೊಲದಾಗ ಬೆಳೆ ಬೆಳೆದಾವ

ಹಸಿರು ತೆನೆ ತೆನೆದು ಹಸಿವನೀಗ್ಯಾವ

ಜಗದಸಿವ ನೀಗ್ಯಾವ

ಅರಿಯೋಣ ಅಕ್ಕರೆಯ ಅಂತರಂಗವೊಂದ

ಸೃಷ್ಟಿಯ ಸೆಲೆ ನೀನು
ಸ್ಪೂರ್ತಿಯ ಅಲೆ ನೀನು
ತ್ಯಾಗದ ನೆಲೆ ನೀನು
ಬರಡಾದ ಬದುಕ ಬೆಳೆಗುವ ಹಣತೆಯು ನೀನು
 
ಅರಿತವರುಂಟೆ ನಿನ್ನಂತರಾಳ
ಅದು ಸಾಗರದಾಳ
ನಡೆದಿವುದು ಅಲ್ಲಿ ಭಾವ-ಬೆಸುಗೆಗಳ ಮೇಳ
ಬೀಳದಿರಲಿ ನಿನ್ನಕನಸುಗಳಿಗೆ ಕೋಳ
 
ಅರಿತೆವೆಂದು ಹಟ್ಟಹತ್ತಿಸಿದವರು
ಅರಿವಿಲ್ಲದ ಅಂದರು
ಅರಿಯದೆ ಅಸುಳೆಗಳ ಕೊಂದರು
ನೀ ಅವರ ಕೈಗೆ ಸಿಗದಿರು
 
ತಾಯಿ-ತಂಗಿ, ಗೆಳತಿ-ಒಡತಿ
ನಿನ್ನದಪಾರ ರೂಪ
ಶಕ್ತಿ-ಸೃಷ್ಟಿ ನಿನ್ನೆರಡು ದೃಷ್ಟಿ
ಸಿಗುತಿರಲಿ ನಿನ್ನ ಬೆಳವಣಿಗಿಗೆ ಪುಷ್ಟಿ

ನಾವು!

ನಿಯತ್ತಿನ ನೊಗಹೊತ್ತವರು
ದುಡಿದು ದಣಿಯಲೇಬೇಕಿರುವವರು
ಗೆಲುವೊಂದ ಕಾಣಲು, ಸಾವಿರ ಸಲ ಸೋತವರು
ಬದುಕಿನ ಮೈಲುಗಲ್ಲುಗಳ ಮಗ್ಗಿಲಲಿ ಮೈಕೊಡವಿ ನಿಂತವರು

ಅವಕಾಶ ವಂಚಿತರು
ಪ್ರಭಾವಿಗಳ ಪವಾಡ ಪಡೆಯದಾದವರು
ಪ್ರಯತ್ನವೆಂಬ ಪ್ರಯಾಣದಲಿ ಒಂಟಿಯಾದವರು
ಬಿದ್ದೆದ್ದು ಗೆದ್ದಾಗ ಬೆನ್ನುತಟ್ಟುವವರು ಇಲ್ಲದವರು

ಸೋಲುಗಳ ಸರಮಾಲೆ ಹೊತ್ತವರು
ಸೋಲ ಸೊಲ್ಲಡಗಿಸಿ ಸೆಟೆದುನಿಂತವರು
ಅನುಭವದಿ ಹರಿತವಾದವರು
ನಾವು, ಸೋಲುಂಡು ಗೆಲ್ಲುವವರು

ನಾ ರೈತ

ನೀ ಪಿಸುಗುಡಲು, ನಾ ದನಿ
ನೀ ನಲಿಯಲು, ನಾ ನಾದ
ನೀ ಕಂಪಿಸಲು, ನಾ ಕಣ್ಣೀರು
ನೀ ಚಿಗುರಲು, ನಾ ಚಿಗರೆ
ನೀ ಕೈಹಿಡಿದರೆ, ನಾ ಕಂದ
ನೀ ಬೆಳೆಯಲು, ನಾ ಬಂಗಾರ
ನೀ ಬಿರಿಯಲು, ನಾ ಬೆದರುಬೊಂಬೆ
ನೀ ಮಣಿಯಲು, ನಾ ಮಣ್ಣು