ಹೂವು ದುಂಬಿ ಬಂದವಿದುವೇ...

ಹೂವು ದುಂಬಿ ಬಂದವಿದುವೇ 

ಬಾಳಿಗೊಡವೆಯು

ಸ್ನೇಹಕೆಂದು ನೀವೇ ಸಿಂಧು

ಎಂದು ನಿಮ್ಮಂದ ಸಾರಿದೆ

ಬಿರಿದ ಹೂವು ಬಿಂದುವಾಗಿ ಜೇನಿನೊಡಲಲಿ

ಬಂದಿಯಾಯ್ತು ಮಧುವೆಂಬ ಮಮತೆಯಿಂದಲಿ

ದುಂಬಿ ಬಿಂದು ಬಂದಿಯಾಗಿ ಮಧುವು ಮೆರೆಯಿತು

ಮಕರಂದವಿದು ಮರೆಯಾಯ್ತು ಮಧುವಿನಂದದಿ.

ನಾಗನ ಪೂಜೆ

ನನ್ನಾಕೆಯ ಆಸೆಗೆ ನಾವಿಕನಾಗಿ
ಸಾಗಿತು ಪಯಣ ನಾಗನ ಪೂಜೆಗೆ

ಹುತ್ತದ ಸುತ್ತಲೂ ಹಣ್ಣಿನ ರಾಶಿ
ಹಾಲು ಹರಿದಿದೆ ಝರಿಯಾಗಿ
ಹೂವಿನ ಹಂದರದೊಳದೊಳಗೇ

ಮಮ್ಮಲ ಮರುಗಿದ ಮನಸು ಕೂಗಿತು
ಪೂಜೆಯನಂತರ ಆರತಿಯೆತ್ತಿ
ಕಂದಗೂ, ಕರುವಿಗೋ ಹಾಲುತುಪ್ಪ
ಹಣ್ಣು ಹಸಿದವಗೆ  ಹಂಚಬಹುದಿತ್ತು

ಪುರಷನೆಂಬ ಪೌರುಷದಲಿ

ಪುರಷನೆಂಬ ಪೌರುಷದಲಿ
ಪ್ರಶಾಂತತೆಯು ನಿನಗಿಲ್ಲ
ಮನೆ, ಮಡದಿ ಮಕ್ಕಳ ನೆನಪಲ್ಲಿ
ತ್ಯಾಗವೇ ನಿನದೆಲ್ಲ

ಗಂಡೆಂಬ ಗಂಡಾಂತರದಲಿ
ನಗುವಿಲ್ಲ ನಲಿವಿಲ್ಲ
ಹಗುರಾದ ಮನವಿಲ್ಲ

ದುಡಿದಣಿದು ದುತ್ತೆಂದು ಬರುವಾಗ

ದುಂಬಾಲು ಬೀಳಲಿಲ್ಲ
ಖುಷಿಯೊಂದ ನೀತಂದೆ
ಮನೆಮಂದಿಗೆಲ್ಲ

ತ್ಯಾಗಕ್ಕೆ ಹೆಣ್ಣೆಂದು ನೀ ಬರೆದೆಯಲ್ಲ

ನಿನ ನೋವಿಗೆ ನೀ
ಅಕ್ಷರ ರೂಪವ ಕೊಡಲೇ ಇಲ್ಲ

ಮರುಮಾತನಾಡದೆ 

ನುಂಗಿದೆ ಮನದಲ್ಲಿ ಎಲ್ಲ
ನಗುವೆಂಬ ಔಷದಿಯ ನೀ ಮರೆತು
ರೋಗರುಜಿನಗಳಿಗೆ ತುತ್ತಾದೆಯಲ್ಲ

ಮರೆಯದಿರು ಮನವ ಹಗುರಾಗಿಸಲು
ಮರೆತು ನೂರಾರು ಚಿಂತೆ
ಬಾಳು ಬೆಳಗಲಿ ಬೆಳದಿಂಗಳಂತೆ

- ಪ್ರಸಾದ್ ಟಿ ಎಮ್

ಮಂದಹಾಸದ ಮುಗುಳುನಗೆ

ಇರಲಿ ಮೊಗದಲಿ

ಮಂದಹಾಸದ ಮುಗುಳುನಗೆಯೊಂದು

ಇದುವೇ ಅವಿಸ್ಮರಣೀಯ ಆಭರಣ

ಆತ್ಮವಿಶ್ವಾಸದ ಹೊಂಗಿರಣ

ಮರೆತು ಮರುಗದಿರು

ಮಗುಮೊಗದ ಮಂದಹಾಸ

ಬಾಳಿಗಿದು ಚಂದ್ರಹಾಸ

ಇದನರಿತು ಹರನಂತಿರು 

ನಗುಮೊಗದ ಮೊಗಶಾಲೆ

ಗೆಲುವಿಗಿದು ಪಾಠಶಾಲೆ

ಬಿದ್ದೆದು ಗೆದ್ದಮೇಲು ಇರಲಿ ಮೊಗದಲಿ

ಮಂದಹಾಸದ ಮುಗುಳುನಗೆಯೊಂದು

ನೀಲ ನಕ್ಷತ್ರ

ನೀಲ ನಕ್ಷತ್ರ 

ಮಿನುಗಲೇಕೆ ಮುನಿಸು

ಮಿನುಮಿನುಗಿ

ನನ್ನೆದೆಯ ದಾಹವ ತಣಿಸು 

ಒಂಟಿಯೆಂದೆಣಿಸದಿರು 

ಬಂದಿಹೆನು ಬಂದುವಾಗಿ

ಬರವಿರದೆ ಬಳಲಿರದೆ

ಬಾಳುಬೆಳಗಲಿ ನೀಲ ನಕ್ಷತ್ರದ ಬೆಳಕಳಿ

ಬರವಿದೆ ಪದಗಳಿಗೆ

ಬರೆಯಲೊಪ್ಪಿದೆನು
ಬರವಿದೆ ಪದಗಳಿಗೆ

ಬಣ್ಣಿಸಲೆಣಿಸಿದೆ
ಭಾಮಿನಿಯ ಬಿಸಿಯುಸಿರ

ಬಣ್ಣಿಸಲಾಗದೆ ಸೋತಿಯೆನು 
ಬಾಂಧವ್ಯದ ಬಣ್ಣನೆಯ

ನೀ ಬೆಳೆಸಲಿಲ್ಲ

ನೀ ಬೆಳೆಸಲಿಲ್ಲ,
ನಾ ಬೆಳಗಿದೆ...
ನೀ ತುಳಿದೆ,
ನಾ ತಳೆದೆ ಮೂರ್ತರೂಪ...

ಪ್ರಸಾದನ ಪ್ರಾರ್ಥನೆ

ಕನ್ನಡಾಂಬೆಯ ಪಾದಾರವಿಂದಗಳಲ್ಲಿ!

ನಿದ್ರೆಯ ನೈವೇದ್ಯೆಗೈದು 
ನಿನ್ನ ಸೇವೆಯ ಮಾಡಿರುವೆ
ಹರಸು ತಾಯೆ,
ನಮ್ಮಿಪ್ರಯತ್ನಕ್ಕೆ
ಮೂಡದಂತಿರಲಿ
ಯಾವುದೇ ಕಪ್ಪು ಛಾಯೆ

ಮಳೆರಾಯ!

ಮಂಕಾಗದಿರಲಿ ದಿನ-ಮನ
ಮೋಡ-ಮಳೆಯ ಮುತ್ತುಗಳಿಂದ
ಬಿಡುವಿರಲಿ ನಿನ್ನ 
ದಣಿವರಿಯದ ದಿನಚರಿಗಳಿಗೆ

ಸೂರ್ಯ!

ಸೂರ್ಯ ರಶ್ಮಿಯ ಹೊಳೆ
ತೊಳೆದಂತಿರಲಿ ಇಳೆ 
ಮೇಳೈಸುತಿರೆ
ಸಾಹಿತ್ಯ ಬಂದುಬಳಗ

ಸಾಹಿತ್ಯ ಸೇತು - ಕಿರು ಕವಿಗೋಷ್ಠಿ

ಇದು ಬಂದವೋ, ಭಕ್ತಿಯೊ 
ಬಂದಿಸಿದೆ ಎನ್ನ
ನಿಮ್ಮ ಸ್ನೇಹ ಪ್ರೀತಿಗಳಲ್ಲಿ

ಮುಗಿಯುತ್ತದೆ ಮನದ ಬೇಗೆ
ಮಾಗುತ್ತದೆ ಮನಸು
ಮುರಿಯದಿರಲಿ 
ಈ ಮಧುರ ಬಾಂಧವ್ಯ

ಅತ್ಯಾಪ್ತತೆಯ
ಆನಂದ ಅನುಭವಿಸಿದೆ
ಅನುರಣಿಸಲಿ ಅನುದಿನವೂ
ಈ ಸ್ನೆಹಬಂದ

ಪ್ರಸಾದನ ಪ್ರಣಾಮಗಳು

ನೀವೆನ್ನ ಸಲಹಿದಿರಿ

ನಾನೆಲ್ಲ ಸಹಿಸಿದೆನು

ನಾವೆಲ್ಲ ಶ್ರಮಿಸಿದೆವು

ಸಾಹಿತ್ಯದಾಶಕ್ತಿ ಸಂಘಟಿಸಿರುವದು ನಮ್ಮೆಲ್ಲರ 

ಪ್ರಶಸ್ತಿ ಪ್ರಶಂಸೆಯಿಂದಾಚೆಗೆ ಬರೆದಿರಿ

ಪೊರೆವಂತೆ ಕಿರು ಕವಿಗೋಷ್ಠಿಯನ್ನ

ತಮ್ಮೆಲ್ಲರ  ಅಮೃತಾಕ್ಷರದಲ್ಲಿ

ಮೂಡಿಹುದು ಸಿರಿಧಾನ್ಯ ಸುಧೆ

ಸೃಷ್ಟಿಸಿರುವದು ಕಿರು ಕಾವ್ಯದಾಮೃತ

ಹೆಜ್ಜೆಗೆಜ್ಜೆಗೆ ಹೆಚ್ಚಿದ ಅನುಭವ 

ದೂಡಿಹುದು ದುಡಿಯಲು ಕಿರು ಸಿರಿಗಾಗಿ

ಸಿರಿಧಾನ್ಯ ಕಾವ್ಯಲಹರಿಗಾಗಿ

ಅಚ್ಚಳಿಯದುಳಿಯಲಿ ಇತಿಹಾಸ ಪುಟಗಳಲಿ

ನಮ್ಮೆಲ್ಲರ ಕಿರು ಕಾವ್ಯ ಸೇವೆ

ಮತ್ತೆ ತಮ್ಮೆಲ್ಲರ ಅಮೃತಾಕ್ಷರದಲಿ, ಎಲ್ಲೆಡೆ ಪಸರಿಸಲಿ

ಸಾವಯವ ಕೃಷಿ

ಸಾರಬೇಕಿದೆ ನಾವು ಸಾವಯವ ತತ್ವ

ಬೇಸಾಯದಿ ಪಾಲಿಸೋಣ ಸಾವಯವ ಸತ್ವ

 

ಮಾಡಬೇಕಿದೆ ದೃಢ ಸಂಕಲ್ಪ

ಉಣಿಸದಿರಲು ಭೂತಾಯಿಗೆ ವಿಷವನು ಅಲ್ಪ

 

ಮರೆತರಂತು ಮಣ್ಣಿನ ಇತಿಹಾಸ

ಸೃಷ್ಟಿಸಲಾಗದು ಮನುಜಮೊಗದಲ್ಲಿ ಮಂದಹಾಸ

 

ಸವಕಳಿ ತಡೆಯಲು ಬದು ನಿರ್ಮಾಣ

ಬದುವಿಲ್ಲದ ಹೊಲ-ಗದ್ದೆಗಳವು ಅಂತರ್ಜಲಕ್ಕೆ ನಿರ್ಯಾಣ

 

ಮಾರಕ ಕೀಟನಾಶಕಗಳು, ರಸಗೊಬ್ಬರಗಳವು ಅಧಿಕ ಖರ್ಚಿಗೆ ದಾರಿ

ಪಾಲಿಸೋಣ ಸಾವಯವ ಸತ್ವ ಆಗದು ಬೇಸಾಯ ದುಭಾರಿ

 

ಸಾವಯವ ಕೃಷಿಯದು ದುಡಿವುದು ಮಣ್ಣಿನ ಬಲವರ್ಧನೆಗೆ

ಬಹು ಬೇಡಿಕೆ ಇರುವುದು ಸಾವಯವ ಬೆಳೆಗಳಿಗೆ

 

ತರಗೆಲೆ, ಕಳೆಗಿಡ ಭೂಮಿಗೆ ಗೊಬ್ಬರ

ಹಾಕದಿರು ನೀ ಮಣ್ಣಲಿ ಕರಗದಿಹ ರಸಗೊಬ್ಬರ

 

ಯುವ ರೈತರೆಲ್ಲರೂ ಮಾಡಬೇಕಿದೆ ದೃಢ ಸಂಕಲ್ಪ

ಉಣಿಸದಿರಲು ಭೂತಾಯಿಗೆ ವಿಷವನು ಅಲ್ಪ

ಜ್ಞಾನ ದೀವಿಗೆ

ಜ್ಞಾನ ದೀವಿಗೆ ಇದು ಹಣತೆಯಂತೆ,

ಹಳತಾದರೇನು ಹೊಸತಾದರೇನು,

ನೀಡುವ ಸುಜ್ಞಾನ ಭೋದವಂದೆ! 

ಹಳತೆಂದು ಅನ್ನದಿರು,

ಅದು ಅನುಭವದ ಕಂತೆ,

ಹಳತಾಗಿರುವುದು ಜ್ಞಾನಸುಧೆ  ಹರಿಸಿದಂತೆ!

ಇರಲಿ ಮನೆ ಮನಗಳಲ್ಲಿ,

ಪುಸ್ತಕದ ಮೇಜು, 

ಅದುವೇ ಸುಜ್ಞಾನದ  ಮೋಜು!

ಬೆಳಕಿನಾಚರಣೆಯ ಬಿರುಸು ಬೆಂಕಿಯಲ್ಲಿ ಬೆಂದಿದೆ

ಕೇಳದಾಗಿದೆ ಪ್ರಕೃತಿ ಮಾತೆಯ ಆರ್ತನಾದ

ಈ ಸದ್ದು ಗದ್ದಲಗಳಲ್ಲಿ

ಪಟಾಕಿಯ ಸದ್ದು ಗದ್ದಲಗಳಲ್ಲಿ

ಹೃದಯಗಳೀಗ ಕಂಪಿಸುತ್ತಿವೆ

ಇಂಗಾಲ ತುಂಬಿದೆ ಗಾಳಿಯಿಂದಾಗಿ

ಮತ್ತದೇ ಮನು ಕುಲದ ಆರ್ತನಾದ

ಕೇಳದಾಗಿದೆ ಈ ಪಟಾಕಿಯ ಸದ್ದು ಗದ್ದಲಗಳಲ್ಲಿ

ಸಹನೆ

ಸಹನೆ ನನದಿರಬಹುದು, ಸಹಿಸಲೇಕೆ ನಿನ್ನ
ಪ್ರೀತಿಯಿಂದ ಧಾರೆಯೆರೆದದ್ದು ಎನ್ನ ಕನಸನ್ನ
ಸಹನೆಯಿಂದ ವಿಕಸನಗೊಳಿಸಿದ್ದು ನೂರಾರು ಹೃದಯಗಳನ್ನ
ವ್ಯಕ್ತಿತ್ವದಿಂದಾಚೆಯ ಹೋಲಿಕೆಯದು ಗುನ್ನ
ನಿರ್ದರಿಸಿಯೇ ಆಯಿತು, ಇಲ್ಲಿಂದ ಕಾಲ್ಕಿಳುವುದೇ ಚೆನ್ನ
ಇಲ್ಲಿಂದ ಕಾಲ್ಕಿಳುವುದೇ ಚೆನ್ನ...

ಸಿರಿಧಾನ್ಯ - ನಾನು ಯಾರು

ನಾನು ಯಾರು ಬಲ್ಲೆಯೇನು
ಆರೋಗ್ಯದ ಸಿರಿಯು ನಾನು
ಪ್ರೋಟೀನು ಐರನ್ನು ಕ್ಯಾಲ್ಸಿಯಂ ಕಣಜ ನಾನು
ಅಕ್ಕಿ ಗೋದಿ ಮೈದಕ್ಕೆ ಬದಲಿ ನಾನು
ಹಿರಿಯ ಸಿರಿಯ ಸಿರಿಧಾನ್ಯ ನಾನು

ಸಮತೋಲನ ಆಹಾರದ ಸರದಾರನು 
ಪಾರ್ಶ್ವವಾಯು, ರಕ್ತದೊತ್ತಡ, ಮಧುಮೇಹಕ್ಕೆ ಮದ್ದಲ್ಲವೇನು
ಕಡಿಮೆ ಕ್ಯಾಲೋರಿ, ರೋಗ ನಿರೋಧಕ ಶಕ್ತಿನೀಡುವೆನು
ಸಿರಿಯ ಹಿರಿಯ ಸಿರಿಧಾನ್ಯ ಸೇವನೆ ಅವಶ್ಯವಲ್ಲವೇನು 

ನೀರ ಬವಣೆ ನೀಗುವೆನು
ಬಿಸಿಲು ಬರ ಶಾಖ ತಟ್ಟದೆನ್ನನು
ಪರಿಸರ ಪೋಷಕನು ನಾನು
ಭೂ ಒಡಲ ಬರಿದಾಗಿಸೆನು
ಮನುಜ, ಮಣ್ಣು ರಕ್ಷಕ ನಾನಲ್ಲವೇನು

ಹಿರಿಯ ಸಿರಿಯ ಸಿರಿಧಾನ್ಯ ನಾನು